തിരക്കില്‍

തിരക്കിട്ടിറങ്ങിത്തിരിച്ചൊട്ടു നിന്നും

തിടുക്കത്തിലെന്തോ മറന്നെന്നതോര്‍ത്തും

കലങ്ങും മിഴിക്കോണടച്ചും  നിറച്ചും

കനപ്പെട്ടു കാതങ്ങളെന്നും കടന്നേന്‍

വരിച്ചില്ല നിന്നെ, വരിക്കാതെ വയ്യെ-

ന്നുരച്ചിട്ടുമില്ല, വരം തേടിയില്ല .

വെറുക്കാതുടക്കാതെയെന്തിന്നടുത്തി-

ട്ടിടയ്ക്കിന്നു കാലൊച്ച കേള്‍പ്പിച്ചിടുന്നൂ

കിലുക്കം ശ്രവിക്കാതെ കര്‍ണ്ണം പൊതിഞ്ഞും

കടക്കണ്ണുടക്കാതിരിക്കാന്‍ പഠിച്ചും

പിടയ്ക്കും ഹൃദന്തം മറച്ചും കിതച്ചും

പറക്കുന്നു ഞാനെന്നെയെങ്ങോ കളഞ്ഞും

വിടര്‍ത്തുന്നു പൂക്കള്‍ നിനക്കായ്‌ വസന്തം

വിളിക്കുന്നു പിന്നില്‍ മടങ്ങാത്തതെന്തേ?

മഴക്കാറ്റിലീറന്‍ ചിലമ്പിത്തെറിയ്ക്കെ-

മറിച്ചെന്തു ചൊല്ലാന്‍, കടപ്പെട്ട ജന്മം

വിറയ്ക്കുന്നു കൈകള്‍, വെളിച്ചം കടക്കാ-

തടയ്ക്കട്ടെ വാതായനങ്ങള്‍ വിമൂകം

വെളുക്കുന്നതിന്‍ മുന്പുറങ്ങ്ട്ടെ, നേരം

വെളുത്താലുമില്ലെങ്കിലും പോയ് വരേണം

തിടുക്കത്തിലെന്നും പിറക്കും ദിനങ്ങള്‍

മടക്കങ്ങള്‍ വൈകും മനസ്സും മടിക്കും

വഴിക്കണ്ണുമായി വൃഥാ നിന്നിടൊല്ലേ

മൊഴിച്ചാര്‍ത്തു തേടി ചരിക്കൂ മറക്കൂ